A mi anik eka novea vorsant bhitor sorlim, hem amche khatir Devachem vhodd dennem mhonn mandun gheun Devak dhin’vasum-ia. Deivik Retir Kendrachea sogllea vhoddilam pasot, hea kendrant amkam bhett korunk sond mell’llole khatir ami Taka argam dium-ia. Amchi kudd mhollear Devachem povitr mondir zaunk ani amchem jivit mhollear deivik yatra zaunk Toch adharachi vatt zaunche khatir taka ami mhoima dium-ia. Amchea jivitant novsornni haddunk amkam praixchit sonskar dila, tacho upiog korun noveponnan bandlolem amchem jivit gheun hea novea vor-sant bhitor sorom-ia.
“Devan tumchea monachi novsornni kelia”
Poilem mhollear ami mandun gheunk zai amkam Devan rochleant ani Toch amkam choloita. Ami devcharachea mann’nniank bhulon sonvsari jivit jiyetat ani Devacher visor ghaltat. Hangach amche koddlean patok zata. Tori Dev amkam novsorta ani borem jivit jiyeonk adhar korta. Bhag. Paulu mhunntta, “Hea atanchea sonvsarachea nemam pormannem tumi cholonakat, punn zoxem Devan tumchea monachi novsornni kelia, toxich tumchea jivitachi chalui novi zaum-di” (Rom. 12:2). Devan amkam Povitr Otmo dila amchea jivitant kitem zai tem ollkhonk. Amche voyoktik dhiei nhoi tor Tachi itsa sodunk ani Tachie khuxie pormannem jiyeonk. Jezuchi dusri adnia ami niyallum-ia, “Tuzoch mog korta toso tujea peleacho tum mog kortolo. Hache poros anik vhodd adnia nam” (Mk. 12:31). Haka anik dusrem koslem spoxttikoronn zai?
“Devachea rajya pormannem jiyeonk… vhoddantlo vhodd husko”
Hea novea vorsant amchea jivitant Devachie povitrtayek zago toyar korum-ia. Bextte nichev kele mhonn bhagchem nam, tem adim somzon gheunk zai. Devachi povitrtai mhollear doyallponn, nomrtai, bhogsonnem, adi. hem gunn kirlounk amchea mona-kallzant kirlonk zai Devacho mog, mhollearuch peleacho mog, pelea vixim astha, Devachem utor vachop ani tem vevharant ghalunk vaurop, magnnem korop, aple khatir ani pelea khatir. Tech porim aplea ani peleachea novea, bhorpur jivita khatir. Hem melloun gheunk nhoi tor tem amchea jivitant vhanvon yeunk, tem amcheant ghosghoxeamni otonk Devacher visvas dovrop bhou gorjechem asa. Bhag. Matev mhunntta, “Devachea rajyachea nemam pormannem jiyeonk ani Taka mandta toslem korunk zaum-di tumcho vhoddantlo vhodd husko ani hio sogllio vostu To tumkamditolo” (Mt. 6:33), kai bori xikvonn hi. Mukhar Bhag. Paulu sangta, “Dekhun tum-chea soimbant asat te sonvsari aundde marun uddoyat, posoddponn, mhelleponn, kamchar, khottio vondavnnio ani ti mannsugie bhailie girestkayechi axa hi axa mhollear khorench kuddea devanchi puza” (Kol. 3:5), oxem kelearuch ami Devachea rajya pormannem jiyeonk pavtolim.
“Sogllem Devak mhoima diunche khatir korat”
Ami soglleamni hea vorsa apnna khatir ani aplea kuttumba khatir sukh-sontos maglach astolo. Hem magop vaitt nhoi. Magle xivai mellonam, darar marle xivai dar ugddonam mhonn Devuch sangta. Ami maglem ani Devan dilem mhonnttoch titleach mapan Devachi tust-tokhnnai zaunk zai, vakhann’nni mhoima zaunk zai, hem ami visortat. Bhag. Pedru mhunntta, “Zonn ekleak Devan ek kherid vorgunn dilolo asa; tor bore karbhari koxe hea vegvegllea vorgunnancho upiog korun ekame-kachi chakri korat” (IPed.4:10) Takach dhorun Bhag. Pauluche udgar, “Tumi jevtat vo piyetat vo kitem-i dusrem kortat tem sogllem Devak mhoima diunche khatir korat” (IKor:10:31). Mhonnttoch hea novea vorsant amcho novo nichev zaum-di peleachi seva korcho ani Devack mhoima diuncho.
“Ti (zannvai) Deva lagim magchi”
Fokot novea vorsant nhoi tor kosli-i novi survat kortanam, zaum to novo dis, novo vaur, novi sonkolpona vo anik kitem-i kortanam Devachea sangnneacher lokx kendrit korum-ia. Ghoddye toxi amkam zannvai nasot zalear, “Dev dita ti zannvai tumche modlea konnakui nam zalear, tannim ti Deva lagim magchi. To ti tumkam ditolo, kiteak To soglleank udarponnan borie khuxin dita (Jak. 1:5). Ho-i Deva koddem mag-pacho vorgunn ami vikasit korunk zai. He vixim stotrant ami oxem melltta, “Mhojea paulank Tujem Utor, ubharlolo divo, uzvadd mhojie vattecho (Stotr 119:105) Hea novea vorsant amche aundde (Devak mandta tosle) xarti pavounk ami Devachi zan-nvai magum-ia, amcheruch patieon nhoi tor Devacher patieon. “Hanv kitem-i korunk xokta kiteak mhaka xokti diunk Jezu asa (Fil. 4:13). Hea Utrancher bhavarth dovrun novea vorsant amchem jivit fuddem vhorom-ia.
