M hoje dimbier poddon Deva lagim magnnem kortanam, mhojea monant okosmat chintnam ailim, itlea mon’xamni niraxi zaun magnnem korchem kiteak soddun dilam kai? Tan-chea magnneak zobab mellonam mhonn? Aplio vinontio sangon diunchem soddun kiteak dileat zait, jednam Tannem tio sakar korcho amchem thaim korar kela? Kiteak lagun hie porjecho visvas ani bhorvanso unne zala kai? Mhaka somzon oxem dislem, hea son-vsari koxttamni tim itlim buddleant, vo fattlea koddu onnbhova vorvim tanchem mon niraxi zalam, vo tanche ghaye azun pekhonk nant. Punn hanv hem-i zanna, Tachi kurpa hia sogllea vostuncher zoit vhoronk amkam puro. Mhaka dislem, hem sogllem portun zagear haddunk zai zalear Tache fuddem magnneant roddon, mhojea kallzantlem dukh khali korcho ekuch upai. Mhaka Tachea mogacher ani kakluticher visvas aslo. Ani hanv zor magnneant thir asot zalear mhojem magnnem To kednanch koddek dovor-cho nam mhonn mhaka khatri asli. Hea vellar mhaka tea kurddeacho ugddas ailo (Luke:18), zaka kollon ailolem, to boslolo asa tie vatten Jezu veta mhonn. Vhoddlean arddun tannem mhunnlem, Jezu Davidachea Puta mhoji kaklut kor”. Thoim asloli lokachi urponz taka ogi ravonk sangtali, punn tanchem utor tannem kana-monar gheunk nam. Tanchem aikon, tannem aplem magnnem bond korunk nam. Portench zalear to anik vhoddlean arddunk laglo, “Jezu Davidachea Puta mhoji kaklut kor”. Ani Jezun tacho tallo aikolo ani tache-xim yeun thamblo. Kitem zai oxem Jezun taka prosn kelo, tednam hea kurddean “mhaka novean nodor ie-xi kor” mhonn aplo aunddo Jezu fuddeant manddlo. Tednam Jezun, “Novean nodor ghe Tujea bhavarthan tuka boro kelo” mhonn hea kurddeachem magnnem aikolem (Lk. 18: 35-42). Jea lokan hea mon’xak ogi korcho proyotn kelolo, tannim tachem taronn dekhlem. Jezun tachea roddnneak bhavarthachie dixen dekhlo ani Apli podvi dakholl keli.
Tosoch mhaka ugddas ailo Kanachie bailecho, jinnem Jezuk aplie dhuve velo devchar kaddunk magnnem kelem (Matev 15). Tinnem mhunnlem, “Jezu Davidachea Puta mhoji kakut kor”. Punn Jezun tika zobab diunk nam. Xisamni yeun tika portun dhaddunk Jezuk san-glem, kiteak ti tanchie fattlean arddio marit yetali. Tichem xisank poddon vochonk nam. Nam mhonn tichem dukh vo tras tannim ollkhon ghetle nant. Tankam fokot ti koddsoron geloli zai aslem. Tednam Jezun tika mhunn-lem, “Devan Mhaka fokot Israelachea Ghoranneachea sanddlolea xelliam thaim dhaddla”. Jezu mukhar dimb-ier poddon tinnem mhunnlem, “Saiba mhaka pav”. Tednam Jezun mhunnlem, “Bhurgeanchem khann kaddun tem sun-neachea petteank uddounchem mhol-lear sarkem nhoi”. Tinnem portipallun mhunnlem, “Saiba, punn aplea dho-niachea meza vele dhornnir poddttat te kuddke sunneache pette-i khatat, nhoi?” Jezun tika mhunnlem, “Ostorie, vhodd tuzo bhavarth! Tuka zai toxem zaum” (Mt. 15: 21-28). Tichea bhavarthak lagun tika zai aslem tem Jezun favo kelem, ani tichea bhavarthachem udharonn dusre-ank favo zalem.
Hea Povitr pustokachea ghoddiamni mhaka ut’tejen favo kelem, mhozo bha-varth haloinastanam magnnem korunk.
Tanche vorvim kollon ailem, ki kednam kednam-i Jezu Aplo zobab diunk uxir korta kiteak amcho bhavarth kedo tem To polleunk sodta. Tanche vorvim kollon ailem konn porim Jezu vegllech vichear ugte korta ani amchem proman-nikponn dusreank dakhoun dita. Mhaka khatri mell’lli konn porim Jezu amchem magnnem aikon gheta ani amchie gorje pormannem amkam dennim favo korta. Hea ghodditamni mhaka ut’tejen dilem, odik khatrien magnnem korunk, hem magnnem favo kortoleak visvaxi ravonk. Kanachie ostorie lagim Jezu modhurayen ani uzvaddit utramni uloilo. Apnnacher, bhavarth, dovrun, Aplo pattlav korunk, Apli kurpa melloun gheunk tika ut’tejit keli. Jednam Jezun tika prosn ghalo, tednam ticho zobab aikon To itlo prob-havit zalo ki Tannem tika mhunnlem, “Tuka zai toxem zaum!”.
Jezu tea kurddea mon’xachea jivi-tant bhitor sorlo, tednam tachem jivit bodol’lem. Tachio addkholli, prosn ani duvidha besanvamni bodol’le. Tache dusman ixtt zale. Oslench kitem Jezu dor eka mon’xachea jivitant kortolo, zo Tacher purnnponnim bhavarth dovrun, magnneant thir ravon, aplo bhorvanso kednanch soddun dinam. Jem kitem amchea jivitant addkholli haddtta tench amchea boreak bodlun, amchem jivit Aplie mhoimek toyar korta.
Izaias provadi oxem mhunntta, “tumi ulo martole ani Sorvespor tumkam zap ditolo, tumi Taka apoitole ani To mhunnttolo Ho polle Hanv asa. Sorve-spor tumkam sodanch vatt dakhoitolo, adlie buniadicher novi ghoram ubim kor-tolo” (Iz. 58:8-12)