ADVENT ZAUN ASA EK KALL ZHOIM AMI DEVA VIXIM ANI HERAM VIXIM AMCHE VICHEAR BODLUNK ZAI.
Mogall bhavam ani bhoinnimno
Ma atevachea xubhvortomanant ami vachlam koxe porim Juanv Batist bondkhonnint astanam aplea xisank Jezu sorim dhaddun vicharunk sangta: “Yeuncho asa to Tunch To, vo ami dusrea konnachi vatt polleunchi?” (Mt 11:3) Kiteak Jezuchea kornnianchi khobor aikon Juanv ghuspota kiteak tachie yeuzonne pormannem yeun-cho aslo to ek bollixt soddvonndar zo soglleank aplea patkantlim soddoitolo, punn Jezucho sobhav ani tachi vagn-nuk soglleam sovem huskean bhorloli asli. To zaun aslo kakluticho sagor, zo soglleank bhogsonnem favo kortalo zhoim “kudd ddim polleunk lagtolim,
thonttim choltolim, khoddkar nitoll zatole, bherim aslim tankam portun aikonk yetolem, melolim jivim zato-lim ani goribank xubhvortoman kollit zatolem.”
Zoxe porim xubhvortomanachi oll khunnaita ki Juanv bondkhonnint asa to zago kallokitt aslo dekhun zaum-ieta ki Juanv Jezuk, yeuncho aslo to soddvonndar mhonn ollkhonam ani tea karnnak lagun to ghuspota ani sarkem kitem tem Jezuk vichar korunk to aplea xisank tache sorxim dhad- dtta. Juanv Batistachi hi vagnnuk amkam ojapant ghalta, kiteak tannem Jezuk Jordan nodint snan dilolem ani tache vixim oxem uloilolo: “Pol-leyat, ho Devacho menddhro, son-vsarant pap kaddtta to” (cf Jn1:29) Tor hache velean ami somzonk zai. kedo-i vhoddlo provadi to zaum, tachea monant dubhav astach ani hem vaitt nhoi. Punn vortem zalear amchi otmik vadd zaunche pasot hem bhou gorjechem. Hem amkam adhar dita somzonk, ami chint’tat tache poros Devachi vizmitam vhodd ani amchea lhan monan tem yeuzunk legit zainam. Tachio milagri ani ochoriam amkam ojapant ghaltat. Dekhunuch ami taka sodit ravonk zai, Tachem khorem mukhamoll polleunk ani tache thaim portun vochonk. Eka famad devxastrian oxem mhunn-lolem asa, “Amchea jivitachea dor eka paunddear ami Devak sodunk zai, To sanddla mhonn somzon.” Juanvanui oxench kelem, to ghuspota ani taka sodta, tache koddem bhasab-has korta, vichar korta ani xekim taka to sodun kaddtta. Jezun Juanva vixim oxem mhunnlam, “Bailank zolmo-lolea bhurgeam bhitor Juanv Batista poros vhodd dusro konn upzonk nam.” Thoddea utramni Jezu amkam xikoita, Devachi mhoima amchea chintnam poros vhodd asa, tachi mhoima amchean mezunk zainam. Ami kaim pauttim Juanv Batista sarkim dubhavant poddttat, Tachem novem mukhamoll zaite pauttim ami ollkhon ghenant kiteak amchea monant ani kallzant ami Deva vixim eke torechem chitr attapun dovor-lolem asa ani teach Devak ami ollk-hotat. Devachi podvi ani mhoima amchea chintnam poros vhodd asa hem ami ollkhonk visortat. Ami chint’tat Dev zaun asa bollixt ani to apnnak zai tem korunk xokta punn amchea khaltea Devachem chitr yenam. Kakutsar ani mogall zo ugteponnim amkam gheta kosloch bhed-vegllochar korinastanam. Zaite pauttim ami tache lagim prosn kortat: Khorench Tum Dev? Itlo khalto zo amchi soddvonn korunk aila? Hem amche sovem ani amchea her bhavam bhoinnim sovem-i ghoddtta. Dekhun hea adventachea kallar ami amche vichear bodlunk zai, tednanch ki ami Devak portun novean polleunk pav-tolim ani Tachi mhoima amchea jivi-tant vhodd dennem koxem bhogunk pavtolim. Zor ami taka yeukar diit To amchem jivit uzvaddit kortolo. Adventant jednam ami balka Jezu-chi zolmachi porob somarombhtat, tednam ami zannun ghetat tachi ollokh. Tea vellar soglle amche adle vichear ami soddun diunchi goroz, zaum te Deva vixim vo aplea bhavam bhoinnim vixim. Hea vellar sonvsari denneam poros dusream thaim borem utor ani kornnio korun bhett diunchi goroz, je porim Jezun kelem kurddea thaim, bheream thaim, khoddkaram thaim, goribam thaim.